Chat cu Mente Positivo

Siman di Amor 

Un bon dia y un feliz siman. Di nos curazon nos kier a comparti cu b’e energia di amor, paz y felicidad p’asina hunto nos alcans’e paz colectivo. Ban papia paz y ban enfoca nos mes solamente rib’e aspectonan positivo di bida.

E simia di sabiduria

Awe nos ta bay combersa cu tin tres forma di amor. E griegonan tabata tin den nan idioma tres palabra pa amor. E prome ta, eros, cu ta nifica pasion sexual cu bo ta sinti pa otro persona; E di dos ta, filos, e ta un sentimento di afeccion of di amistad; e di tres ta, agape, esaki t’e amor paternal pa henter humanidad.  E ultimo aki ta demostr’e sentimento nan cu nos mester tin pa stima tur hende cu cariño. Tambe mester ta inclui esun nan cu nos no conoce y cu nos no ta haña hopi leuk. Esaki t’e amor cu ta duna sin spera nad’a cambio. Kiermen c’e amor cu nos mester ta desaroyando ta agape. Awo t’e momento pa implementa e tipo di amor aki. Ban pone nos intencion pa habri y ricibi amor.

E bril diferente

Aruba, tin su gabinete nobo cu tin e responsabilidad di cumpli cu locual nan a priminti durante campaña. Internacional, e weganan olimpico 2016 lo ta na Rio de Janeiro.

E bentana di nos vida

Awe nos ta bay papia di nos mes y con hopi nos ta stima nos mes. Humanidad ta busca nan propio felicidad stimando nan mes.

Nos por puntra nos mes kico ta autoestima? Autoestima t’e percepcion emocional cu cada ser humano tin di su mes.  Ak’e ser humano ta mustra c’e tin respet pa su mes y pa yuda otro nan haci mescos. Autoestima ta indispensabel den un relacion cu otro ser humano, e t’e base d’un bon salud mental y fisico. Nos mester cuida nos mes na prome luga, p’asina nos lo por yuda otronan. Esaki no ta egoismo, pero t’e responsabilidad cu nos tin pa cu otronan. Bib’e presente, bib’e momento y haci locual cu ta haci bo feliz.      

Love signal

Nos ta presenta aw’e cancion “Live your Life”. E cantica aki ta bay hopi profundo den con nos por ta feliz cu locual nos tin y con nos por ta igual. Nos mester kere den locual nos ta haci. Nos mester trata otro manera nos kier wordo trata, apesar di tur nos diferencianan.

Resumen

Resumiend’e topiconan di awe. Enfocando riba nos autoestima, respet  pa nos mes pa nos por controla nos emocion nan pa por trata otro; bo mester stima bo mes prome pa bo por stima otro; cumpli cu norma y balornan den nos comunidad; amor ágape cu t’e dedicacion y cariño pa otro; nos tin cu cumpli cu nos mesun mision; no balota ni menos precia e mision di otro.

Dialogo:

Bou di ki norma nos mester biba? Nos tin cu biba c’e pensamento di bienestar di tur. Nos mester ta semper flexibel. Den energia universal e persona mester sinti su mes bon prome, p’asina e por stima otronan, no cu egoismo sino cu proposito. Normanan ta cambia segun e progreso d’e humanidad. E normanan principal manera, respet, balor na otronan ta pertenece n’e ser humano. Nan mester keda semper importante y no bay perdi. Pakico pobresa ta existi, paso asina nos por yuda. Normanan por kita nos libertad. Laga nos cambia nos mentalidad di limitacion pa nos por biba uni cu otro. Sabiduria cu educacion no ta link cu otro. Un hende por tin menos educacion pero si sabiduria. Norma nos ta saca for di nos mes y cu si nos activa e “gene” cu nos tin comun nos ta traha mas uni.   

Nos no mester lubida di trata tur hende manera hende sin importa di unda nan ta bin. Nunca nos no mester lubida ken nos ta y kico ta nos misión den bida.

Afirmacion:

“Cada dia den tur forma ami ta bira miho y miho, cada dia den tur forma abo ta bira miho y miho, cada dia den tur forma nos ta bira miho y miho, cada dia den tur forma bida ta bira miho y miho.”

Dor di haci esaki tur dia, bo ta habri bo mes p’e regalonan di bida y finalmente bida ta cuminsa bai bon p’abo y tur cu ta rond di bo. CORDA mantene bo mente positivo.