Siman di Paz Interno
Un bon dia y un feliz siman. Di nos curazon nos kier a comparti cu b’e energia di amor, paz y felicidad p’asina hunto nos alcans’e paz colectivo. Ban papia paz y ban enfoca nos mes solamente rib’e aspectonan positivo di bida.
E simia di sabiduria
Awe nos ta bai papia di kico hende ta consisti di dje. Hopi biaha nos ta lubida un parti di nos cu nos no ta wak cu ta hopi presente; nos ta pone mas atencion na locual nos 5 sinti ta duna nos. Nos 5 sinti ta limita nos na p.e. wak rayonan di luz manera di gama, ultra violet, etc. Ak’e ta bisa nos cu nos wowonan ta limita. E limitacionnan aki ta duna nos di conoce cu nos no sa tur e berdad y cu nos no por depende solamente di nos 5 sinti. E parti cu nos no ta wak den nos ta nos alma. Nos no ta pone atencion na dje. Si nos como ser humano ta consisti d’ un totalidad y tin e parti aki cu ta invisibel, kico nos ta haciendo p’e parti aki desaroya? Nos ta hopi concentra riba nos curpa fisico, anto no realizando cu incluso nos curpa fisico ta consisti di 70 pa 80% di awa. Hopi di nos ta kere den Dios, pero no ta sinti Dios. E hecho cu nos no ta wak e of sint’e esey no kiermen cu no tin un forsa mas grandi cu nos, rond y den nos. E t’un frecuencia y energia. Ban cultiv’e p’asina nos por ta feliz y ta locual nos por ta. Nos no mester lubida c’e forsa aki a crea nos tur. Kiermen nos tin algo en comun. Ban honra esaki. E alma, nos parti invisibel, ta uni nos. Ban pensa union!
E bril diferente
Aruba, e proceso democratico ta mustra cu nos ta madurando respetando nos ideanan y conviccion di cada cuidadano. Internacional, tabata tin un marcha mundial pa mustr’e gana d’e ser humano pa tin paz y respet pa tur hende rond mundo.
E bentana di nos bida
E atencion di awe ta bai rib’e palabra paz. Henter humanidad ta pidi pa paz mundial. Profesornan ta splica cu paz t’un descanso profundo d’e mente d’un ser humano. Den e momento aki nos por scuch’e bos di Dios den nos y asina hañ’e sabiduria den bo bida diario. Expertonan ta indica cu paz t’un energia. Paz ta haci cu hendenan por logra ordo y ekilibrio den nan bida. Dor di esaki nos por tin salud y un mente calmo. Paz t’e estado puro di nos alma y e principio fundamental di spiritualidad.
Love signal
Nos ta presenta aw’e cancion “Crazy”. E cancion ta papia d’un persona cu tabata loco. E ta bisa cu ora nos ta yama un hende loco t’un persona cu no ta pas den sociedad. E no ta actua manera ta spera di dje. Cu loco no kiermen c’e no sa nada pero k’e sa hopi. Dor di esak’e no ta actua manera cu sociedad ta acepta.
Resumen y dialogo
Resumiend’e topiconan di awe, nos creador a crea hende na su imagen y c’e hende tin e potencial y capacidad pa resolve hopi situacionnan; nos mester ban pensa di union y no den separacion; crea union y no polarisacion tanto den politica y bida diario; paz t’un anhelo mundial, responsabilidad di cada un di nos pa contribui na yega n’un harmionia colectivo; tin hopi hende cu diferente opinion; no necesariamente cu hende cu ta pensa diferente ta loco, pero c’e ta ilumina y nos mester purba na compronde.
Kico ta bin prome harmonia of paz. Paz tin cu cuminsa pa den. Dia cu cada ser humano dicidi di tuma responsabilidad pa crea paz y harmonia den nan curason e lo refleha den e mundo pafo. P.e. pakico tin guera paso nos mes tin hopi guera interno. Semper nos ta busca e diferencia entre nos, pero casi nunca nos no sa busca e algo en comun entre nos. Nos no ta kere c’un solo hende por logra cambio. Nos mester reconoce cu nos t’un y asina no tin separacion. Nos mester corda cu ora nos pensa no solamente nos ta afecta nos mes, pero otro tambe. Si nos pensamento ta positivo tur cos rond di nos ta refleha esey. Awendia nos ta papia hopi di globalización, e sistema aki ta mustra nos cu nos mester traha na beneficio di un y tur. Pensamento y sentimento di paz ta crea paz rond di bo. Nos tin cu haci esfuerso pa cambia nos forma di pensa pa cu otro hende.
Afirmacion:
“Cada dia den tur forma ami ta bira miho y miho, cada dia den tur forma abo ta bira miho y miho, cada dia den tur forma nos ta bira miho y miho, cada dia den tur forma bida ta bira miho y miho.”
Dor di haci esaki tur dia, bo ta habri bo mes p’e regalonan di bida y finalmente bida ta cuminsa bai bon p’abo y tur cu ta rond di bo. CORDA mantene bo mente positivo.
