Siman di Bienestar
Un bon dia y un feliz siman. Di nos curazon nos kier a comparti cu b’e energia di amor, paz y felicidad p’asina hunto nos alcans’e paz colectivo. Ban papia paz y ban enfoca nos mes solamente rib’e aspectonan positivo di bida.
E simia di sabiduria
E topico di awe ta bienestar. E ta wordo uza hopi biaha individualmente en bes di traha p’e bienestar comun. Kico kiermen e palabra bienestar? Nos semper ta zorg pa nos ta bon, pa nos tin tur cos c’e enfoke semper riba nos mes. Nos tin cu corda c’e bienestar comun ta inclui nos tambe. Ora nos pensa riba tur otro hende nos ta pensando riba nos mes. Nos meta mester ta basa rib’e bienestar di tur hende. Dor di pensa y yuda otro automaticamente nos tambe ta bon. Nos tin un mision comun, cual ta: Yuda e bienestar comun. Dia cu nos cambia y pensa den e bienestar comun nos ta bai cuminsa ripara c’e mundo lo cambia. Stima bo prohimo mescos cu bo ta stima bo mes.
E bril diferente
Aruba, c’e “shut down” di Valero nos mester pensa positivo y ta creativo pa por logra alternativanan mucho mas miho. Internacional, e morto d’e senador Kennedy ta haci nos reflexiona rib’e parti di servicio na humanidad. E persona aki hunto cu su famia a dedica gran parti di nan bida na yuda comunidad. E ta un bon ehempel pa sigui.
E bentana di nos bida
E atencion di awe ta bai rib’e palabra miedo. E tin un impacto hopi grandi riba humanidad. Por ehempel tur ser humano tin miedo di perde rikesa, nan sernan keri y tambe di ta nan mes, etc. Nos sa kico ta miedo? Miedo t’un sentimento di necesidad y no di realidad. E ta falta di balor pa continua den bida. Expertonan ta describ’e com’e incapacidad di por resolve problemanan. Miedo t’un emocion. Miedo no ta kita tension y no ta duna nos paz interno. Miedo ta djis un parti d’e ser humano cu ta yuda na nos crecemento. E por ta saludabel dor c’e ta duna bo e forsa pa bo por core di peliger. Miedo t’un regalo. E ta den nos pa tene nos safe y hiba nos na tin fe. Dor di tin fe nos por neutralisa nos fe. Unda fe ta domina miedo ta silencioso. Fe t’un multi vitamina cu ta duna speransa, curashi, conviccion y firmesa.
Love signal
Nos ta presenta aw’e cancion “I got the feeling”. E ta papia di cu awe nochi ta bay ta un bon anochi. Cu nos ta bay sali y pasa bon. E t’un cantica cu ta inspira nos pa pensa cu kico nos haci cada momento ta positivo. E ta di beneficio pa otronan y tambe ta reenfors’e parti di sentimento.
Resumen y dialogo
Nos a cuminsa cu bienestar comun. Pa yega na esey nos mester tin sirbidonan di pueblo cu ta dedica nan mes cu fe na yuda un y tur. E contrario di miedo ta curashi cu ta basa riba fe.
Nos kier sa si miedo tin bienestar. Miedo ta limita hende pa expresa nan mes. Si miedo ta existi y t’e base di tur otro emocion, ta significa cu tin falta di amor y fe. Nos tin miedo paso nos ta kere cu nos ta separa. E separacion aki ta haci nos individualista, sin pensa riba otronan. Nos mester por t’uni apesar di nos diferencianan. Miedo tin su proposito pas’e ta haci nos busca fe y amor.
Afirmacion:
“Cada dia den tur forma ami ta bira miho y miho, cada dia den tur forma abo ta bira miho y miho, cada dia den tur forma nos ta bira miho y miho, cada dia den tur forma bida ta bira miho y miho.”
Dor di haci esaki tur dia, bo ta habri bo mes p’e regalonan di bida y finalmente bida ta cuminsa bai bon p’abo y tur cu ta rond di bo. CORDA mantene bo mente positivo.
