Siman di Cambio di Mentalidad
Un bon dia y un feliz siman. Di nos curazon nos kier a comparti cu b’e energia di amor, paz y felicidad p’asina hunto nos alcans’e paz colectivo. Ban papia paz y ban enfoca nos mes solamente rib’e aspectonan positivo di bida.
E simia di sabiduria
Awe nos ta bai papia di cambio di mentalidad. Hopi biaha ora nos ta kere den e sernan superior, nos ta resa y pidi na nan, nos ta kere cu ta nan ta bai hac’e pa nos. Nos no ta realisa cu nos por pidi y resa pero esun cu tin cu implemente y practica ta nos. Nos como ser humano tin e responsabilidad y trabou pa hac’e nja wordo haci dor di nos. Ban cuminsa na transforma e manera cu nos ta pidi y resa. Primeramente nos tin cu cuminsa na duna danki n’e sernan superior. Tene semper na cuenta cu t’abo tin cu hac’e trabou y cana e caminda. E locual cu abo kier biba y logra t’abo tin cu pone den accion. Si nos kier cambio nos mester t’e cambio.
E bril diferente
Aruba, den e dianan aki nos tin e honor di tin e bishita di famia real pa haci actonan oficial durant’e weganan di reino. Tambe Love and Light a presenta e pelicula “Moses code”. E mensahe ta pa nos compronde cu nos tur ta conecta cu otro pa crea cosnan miho den mundo. Internationalmente, rond mundo na embahadanan di Iran tin un protesta c’un peticion pa lag’e presonan cu a protesta contra d’e resultadonan di eleccion na Iran liber. Esaki nan ta pidi na UN.
E bentana di nos bida
Awe nos ta bai papia di 2 aspecto hopi importante d’e ser humano cual nan ta , disciplina y actitud. Esaki nos por observa den e hoben atletanan cu ta representando nan pais den e weganan di reino aki na Aruba. Tanto den arte y deport’e disciplina, training, pasion y determinacion ta aspectonan cu cada hoben mester tin. Atrabes di disciplina e persona tin e habilidad pa siña propio control, direccion, competencia y cuido personal. Durant’e weganan di reino e participantenan kier comparti paz, amistad y union. P’esey ta impotant’e actitud di cada un. Paso dor d’un actitud cu balor y respet pa otro bo por yega na exito.
Love signals
Cantica di awe ta “One Day” di Matisyahu. E cantica ta bisa c’e dia cu bo lo wak cu no ta bai tin odio, bringamento mas. Unda tur cos ta bai cambia di negativo pa positivo. E papiando di resultadonan cu ta pone nos bai sinti bon. E no ta bai pa gana of perde. E dia t’ey caba ta solamente nos mester manifest’e. Un combinacion di disciplina y actitud positivo ta duna fortaleza y firmesa interno.
Resumen
Nos a papia awe di cambio di mentalidad; compronde cu nos ta conecta cu y crea cosnan miho; disciplina, respet y actitud corecto pa cu otro; e dia cu ta bin cu tur cos ta cambia den positivo.
Dialogo
Kico t’e esfuerso cu cada ser humano tin cu haci pa logra. Actitud ta ken nos ta. Esaki ta wordo forma dor di nos pensamentonan y kico nos ta kere den dje. Locual cu nos ta kere of pensa no ta esaki so, lo hiba nos na exito, pero tambe disciplina. Disciplina t’e esfuerso cu nos ta pone pa logra algo. Semper nos mester tin perseverancia y determinacion pa logra nos meta.
Den bida nos sa cua ta nos habilidadnan y asina nos ta scohe por ehempel un deporte cu nos ta sobresali den dje. E importancia di tur esaki t’e trayecto pa yeg’e meta. Nos tin cu celebra cada triunfo durant’e trayecto.
Nos mester wak obstaculo manera oportunidanan p’asina demostra kico nos tin paden. Tambe nos mester tin curashi y motivacion pa nos logronan. Nos mester kere den nos mes. Ta importante pa nos bai internamente y manifesta e sensacion di paz den ful nos curpa.
Encuant’e pelicula “The Moses code”, “I am that, I am”. Ora cu nos ta bisa cu nos ta esey, nos mester tin compasion p’e otro hende. Nos no mester husga ni critica otronan. Nos no ta separa, nos ta un. Nos tur tin algo en comun.
Afirmacion:
“Cada dia den tur forma ami ta bira miho y miho, cada dia den tur forma abo ta bira miho y miho, cada dia den tur forma nos ta bira miho y miho, cada dia den tur forma bida ta bira miho y miho.”
Dor di haci esaki tur dia, bo ta habri bo mes p’e regalonan di bida y finalmente bida ta cuminsa bai bon p’abo y tur cu ta rond di bo. CORDA mantene bo mente positivo.
