Siman di Liderazgo
Un bon dia y un feliz siman. Di nos curazon nos kier a comparti cu b’e energia di amor, paz y felicidad p’asina hunto nos alcans’e paz colectivo. Ban papia paz y ban enfoca nos mes solamente rib’e aspectonan positivo di bida.
E simia di sabiduria
Awe nos ta bai papia di comportacion. Pa mas exacto ta comportacion di un lider. Lider mester t’un hende cu por logra cu personanan rond di dje tin un mente trankil. E mester ta un hende cu ta convence bo, laga bo sinti sigur y cu ta duna bo curashi. Un lider nunca mester duna ordo of dicta un persona. E lider mester duna speransa y confiansa. E mester ta generoso, suave, duna siguransa y paz mental. Lider no t’e posicion sino e cualidad y e caracter d’e persona. Un bon lider mester ta hopi mas “streng” cu su mes y suave pa cu otronan. Paso ora abo ta “streng” cu bo mes bo ta saca lo miho di bo mes. Un persona cu t’un lider mester tin un spirito di fe y confiansa den su mes. Tur esaki bo por logra dor di pone atencion na bo cualidadnan.
E bril diferente
Internacional, un avion cu a cai tabata tin solamente 2 sobreviviente cual t’un baby y un mucha di 12 aña. Esaki kiermen cu nan tin un mision pa cumpli den bida. Aruba, a keda completamente den un “Black Out” y aki ta unda nos mester a aplica nos creatividad. Nos mester tuma tur situacion pa nos por saca lo miho di dje.
E bentana di nos bida
Awe nos ta bai papia di un bon lider. Un bon lider mester conoce su hende nan y yuda nan den nan desaroyo personal. Tin un dicho ta bisa: Pone hende nan traha hunto t’un comienso, pero mantene nan hunto t’un progreso. E jabi pa forma un team ta depende di cada un su trabou na unda ta reina e libertad di intercambio di opinion. Den un team e lider ta fundamental. Pa forma cualkier grupo di hende no ta bai p’e trabou cu nan ta bai haci sino e enfoke mester ta riba e balornan d’e ser humano.
Love signals
Canticanan di awe ta: Man in a mirror, Michael Jackson; Den bo scochi, Caressa, t’un cantica di gratitud na señor.
E cantica fascination di Alfabeath ta papia di “exaltation”. “Exaltation” t’un estado di delicia spiritual. E ta stimula bo imaginacion. E ta hac’e mente hopi mas profundo. Ban exalta nos balor, cualidad y cosnan positivo cu nos kier logra.
Resumen
Nos a papia awe di liderazgo y c’un lider mester dun’e ehempel y mester guia dor di su mesun actitud; aceptacion di tur situacion cu presenta y siña e les di dje; “team building” y e rol d’un lider. E lider mester conoce su habilidadnan y di su grupo.
Dialogo
Cada un di nos t’un lider. Un lider t’un persona cu sa kico e kier y asin’e ta desaroya su cualidadnan. Lider ta ken cu tuma reponsabilidad pa su mes. Un lider t’un maestro di su mesun ser. E cualidadnan d’un lider ta internamente. Pesey ta importante conoce bo mes. Exalta kiermen b’a logra saca lo maximo di bo mes. Bo tin lidernan c’a nace y c’a bira lider den bida. Liderazgo tin di haber tambe cu educacion. Aki ta unda bo ta bai saca lo miho d’un hende. Nos tur ta nace c’e posibilidad y potencial di t’un lider. Atrabes d’e educacion cu nos ta haña nos ta desaroy’e.
E hende muhe no ta realisa cu nan t’un gran lider. Nan ta “multi task”. Bo sa cuanto responsabilidad e ta exihi d’un ser humano pa ta den tanto situacion pareu. Kiermen e hende muhe t’un lider cu no ta wordo reconoci.
Un lider t’un sirbido. Bo mester sirbi bo hendenan. No ta posicion ta tur cos. Un lider mester ta humilde.
Afirmacion:
“Cada dia den tur forma ami ta bira miho y miho, cada dia den tur forma abo ta bira miho y miho, cada dia den tur forma nos ta bira miho y miho, cada dia den tur forma bida ta bira miho y miho.”
Dor di haci esaki tur dia, bo ta habri bo mes p’e regalonan di bida y finalmente bida ta cuminsa bai bon p’abo y tur cu ta rond di bo. CORDA mantene bo mente positivo. 
