Chat cu Mente Positivo

Un bon dia y un feliz siman. Di nos curazon nos kier a comparti cu b’e energia di amor, paz y felicidad p’asina hunto nos alcans’e paz colectivo. Ban papia paz y ban enfoca nos mes solamente rib’e aspectonan positivo di bida.

E simia di sabiduria

Awe nos ta bai papia na con pa ta mas sabi. Conoce otronan ta inteligencia. Nos tin cu haci esfuerso pa conoce otro personanan. Asina aki nos ta bai ta mas feliz.  Conoce bo mes t’e sabiduria berdadero. Aki ta na unda bo ta hopi mas feliz. Ta maestro di otro ta forsa y ta maestro di bo mes t’e berdadero poder.   Nos tin cu realisa c’e mayoria di tempo nos tin cu pasa ta conociendo nos mes. E conoce bo mes kiermen ful bo ser. Paso e ser humano ta consisti na con bo maximalisa, crece y con bo por haci mas ainda pa bo por ta un miho ser.

Conoce bo mes kiermen, sa di bo emocionnan, bo limitacionnan y potencial. Den un palabra tur bo ser. No lubida di pone den practica tur e concocemento cu bo ta haña.

E bril diferente

Aruba, a duna reconocemento na tur cu di un of otro forma a yuda siman pasa cu e crusero Ocean Dream.  E comision di bon boluntad ta funcionando atrobe pa implementa cierto reglanan di conducta y etica p’e temporada di eleccion. Esaki lo yuda pa salvaguardia e libertad di opinion y di organisacion cu respet pa otro.

Tres cantante di e islanan ABC  a uni nan voz  pa duna nan cooperacion, apoyo y stimulacion na nos hendenan.

E bentana di nos bida

Awe nos ta bai papia d’e palabra exito.  Diferente hende ta defini e palabra exito como felicidad y paz mental. Hopi biaha nos no ta para un rato den bida y comprond’e pasonan basico pa alcanza exito y dun’e su berdadero nificacion. Exito t’un habilidad pa construi bo bida manera bo kier y pa tuma e vision na unda bo kier bai. Tambe ta, plania e detayenan di cada un d’e fasenan ya menciona. Ta honesto cu bo y determina kico bo kier logra den bo bida. Construi den bida y tin e curashi pa haci cambionan.  Pa bo tin exito den bida bo mester pone enfasis den conoce bo mes y haña control di bo mes.

Love signals

E cantica di awe ta Shackles (Praise you) di Mary Mary. E cantica di awe ta duna hopi inspiracion y positivismo. Shackles kiermen cadena cu ta kita bo libertad. E cantica aki ta bisa pa kita e shackles nan pa bo por biba di nobo. Den ki situacion cu bo por ta,  tin speransa. Si nos bai bek na nos balornan nos ta bai sa na expresa locual cu nos tin paden. Aki ta unda bo por biba feliz y contagia otronan. Ban busca locual cu ta internamente berdad.  

Resumen

Nos a papia awe di conoce otro ta inteligencia, pero conoce bo mes ta sabiduria; libertad di escogencia , opinion, participacion y organisacion; exito, tin vision y ta honesto cu bo mes; speransa pa cambio, mehoracion; un estilo di bida positivo y puro.  

Dialogo

Pa conoce bo mes bo mester kita bo mes practicamente sunu di tur ideologia, pensamento y emocionnan cu no ta yuda bo. Ora nos haci esaki nos tin e oportunidad di conoce nos mes. Ora bo conoce bo mes bo ta influencia otronan. Nos tin cu realisa cu nos tur tin un conexion cu otro. Nos no mester lubida cu ora nos ta yuda otro, nos ta yudando nos mes.

Kico bo ta “willing” pa haci pa libertad?

Pa cuminsa bo tin cu scohe pa bo ta liber internamente, liber di pensamento, idea y creencia. Ban hac’e esfuerso aki cu lo yuda nos t’un miho hende.

Libertad kiermen supera e limitacionnan d’un ser  humano, manera rabia, miedo etc.,  nan t’un alarma cu ta indica cu mester un cambio.  Nos tin cu siña con pa haci uzo di nan positivamente.  

Un gesto/pensamento positivo:

Si un persona, pais ta den cualkier situacion, nos por uni forsa den pensamento y manda un gesto positivo. E pensamento colectivo positivo ta haci milager.

Awe nos ta mandando un gesto positivo: p’e pueblo di Iran; pa tur e personanan cu di un of otro manera lo por sint’e efecto s’e refineria Valero sera su portanan.

 Afirmacion:

“Cada dia den tur forma ami ta bira miho y miho, cada dia den tur forma abo ta bira miho y miho, cada dia den tur forma nos ta bira miho y miho, cada dia den tur forma bida ta bira miho y miho.”

Dor di haci esaki tur dia, bo ta habri bo mes pa e regalonan di bida y finalmente bida ta cuminsa bai bon p’abo y tur cu ta rond di bo.  CORDA mantene bo mente positivo.