Chat cu Mente Positivo

Un bon dia na tur y un feliz comienso di siman.

Na prome luga un danki na tur e hendenan special cu ta para tras di e programa aki y cu ta pone den practic’e lema cu ta “solamente hende por yuda hende”. 

Kico si ta bon: E topico awe ta cambio di consenshi. Kico ta consenshi y unda e ta? Consenshi ta den bo curason. Consenshi ta stem c’e coneccion dibino, cu ta bisa bo locual cu ta corecto y bon pa haci pa tur hende. Ora cu bo ta papia di cambio di consenshi bo mester scucha sin ningun distraccion e stem cu ta bisa bo pa haci lo corecto, cu abo tin un proposito y un mision mas grandi. Tambe e ta bisa bo cu cada escogencia di bo ta bin dor guia dibino. Ora bo ta pendiente cu bo mes, aki ta unda bo no ta conecta c’e stem dibino. Nos ta bibando un momento di cambio na unda cu hendenan cu usualmente por ta distrai cu material y cu nan mes ta bisando cu nan ta bibando solamente pa yuda humanidad. Mundo henter a celebra e cambio e diamars c’a pasa. Nos tin cu forma parti d’e onda ey nan di cambio positivo. A wordo demostra cu no solamente hende ta cambia, un pueblo ta cambia pero un gran mayoria d’e mundo a cambia. Nos mester haci enfasis riba e palabranan kere, speransa y cambio padilanti. Nos mester biba c’un proposito mas grandi y ta nos consenshi ta nos guia. Ban celebra e cambio di consenshi.

E Bril diferente: Aruba, tin rebaho d’e “brandstofclausule”; E cas di Lions a haña un doño; tin “college fair” na unda hobennan por haña informacion encuanto nan estudio; nos minister president ta motivando nos hendenan pa bira empresario. Internacional, Merca a experimenta un cambio grandi den e resultado d’e eleccion pa presidente cual presidente ta di colo, Obama, c’a logra move consenshi y e poder colectivo mundialmente.

E Bentana di nos bida: Awe nos ta bai papia encuanto conocemento. Tin 2 tipo di conocemento cual ta, locual cu nos sa y locual cu nos alma sa. E conocemento cu nos tin no ta yuda nos na cononoce nos identidad berdadero. Nos alma ta stimula varios aspecto di nos consenshi p’asina recorda tur locual nos tabata sa. Tur cos cu nos ta experiencia den bida ta basa den nos locual cu nos ta percibi. Dor d’e experiencia aki nos ta siña y evoluciona. Pesey ta hopi bon pa nos por tin un coneccion cu nos alma.

Love Signals: E cantica di awe ta: “Everybody is free to feel good”. Di con nos no ta gusta admiti cu nos ta sinti bon. Te hasta nos ta lubida con e ta pa sinti bon. Ora tur hende comparti nan speransa e amor lo resalta. Nos ta bibando e momento pa sinti bon.

Resumen y dialogo: Resumiendo, a worde papia di cambio di consenshi y c’e eleccion di e presidente OBAMA nos t’ un paso dilanti den e evolucion d’e ser humano y e pensamento colectivo. E conocemento pa compronde tur e cosnan aki bo mester pone atencion n’e guia spiritual. Tur e esencia cu a wordo treci padilanti awe ta pa abo sinti bon y nos mester tin confiansa.  

Hopi biaha nos ta kere cu conocemento ta locual c’e  ser humano tin den buki y nos sa tambe cu tur esakinan ta limita henter mundo. Nos tin cu busca otro fuente di informacion. E fuente di informacion ta bin for di bo alma. 

Pa bo por cambia e mentalidad d’ un hende bo mester traha cu frecuencia.  Aki ta unda nos mester compronde cu tur cos ta energia y cu finalmente nos ta cambiando e locual cu mester wordo cambia. Dor di kere den religion e ta haci e stap pa bo kere den algo mas facil. Ora cu nos ta papia c’e ser humano ta biba su experiencia atrabes di su sintinan, nos mester kere cu nos ta sinti bon y cu te hasta nos por cura nos mes.

Stop di gaba bo mes, sea humilde paso e cambio positivo ta sigur!

Affirmacion:

“Cada dia den tur forma ami ta bira miho y miho, cada dia den tur forma abo ta bira miho y miho, cada dia den tur forma nos ta bira miho y miho, cada dia den tur forma bida ta bira miho y miho.”

Dor di haci esaki tur dia bo ta habri bo mes p’e regalonan di bida. Finalmente bida ta cuminsa bai bon  pa bo y pa tur esnan rond di bo. Pls corda mantene bo mente POSITIVO!