Siman di Duna
Un bon dia na tur y un feliz comienso di siman.
Na prome luga un danki na tur e hendenan special cu ta para tras di e programa aki y cu ta pone den practic’e lema cu ta “solamente hende por yuda hende”.
Kico si ta bon: E topico awe ta, con pa yena e bashi. E con di yena e bashi ta simplemente dor di duna. Ora di duna e no tin di haber cu e hende cu ta ricibi locual bo ta duna, pero e tin di haber cu bo. Ora bo ta duna bo mester hac’e di un manera caminda bo intencion ta solamente pa duna sin ricibi nada a cambio. Dor di duna cu intencion di ricibi, aki ta unda bo ta bai sinti e bashi. Si bo ta duna sin intencion di ricibi, bo curason ta yena, paso e inteligencia universal sa cu bo ta dunando tur locual cu abo tin. Aki ta unda bo ta crea e oportunidad pa ricibi. Asina e inteligencia universal ta cumpli cu su mision y proposito di yena bo curason. Hende no ta ricibi paso nan tin miedo. Aki ta sigui un technica pa kita miedo. E unico cos cu bo mester tin t’e intencion pa saca e miedo. No ta importa con bo sac’e, e mester ta un intencion constantemente. P.e. ora bo ta resa anto bo intencion ta cu cada biaha cu bo resa bo ta saca e miedo di bo curpa, kere cu bo ta bai los d’e miedo. Esaki ta yuda bo duna mas y haci e diferencia. Ban cuminsa duna sin intencion di ricibi.
Bukinan di siman (Antraco): Loving child is not enough. Positive discipline that works. E buki ta bisa: Nos mester cuminsa na dicidi cu nos ta grandi caba y haci cosnan diferente. Ban cuminsa na siña nos muchanan con pa ta agradecido, duna danki hasta si bo no ta haña locual cu bo kier. Asina aki cuminsa cambia y ta un miho hende. Elogia un hende y apreci’e.
Bril diferente: Noticianan mundialmente ta mustra cu tin un necesidad di cambio. Aruba, tin rebaho den e brandstofclausule y tambe trankilidad na Elmar. Tin un proyecto amplio pa mehora e “beach”nan. Hulanda, compara cu aña pasa e porcentahe di comerciantenan cu kier establece un negoshi nobo. Merca, eleccion ta den porta y e palabra cambio ta resalta den tur sentido.
E Bentana di nos bida: Awe nos ta bai enfoca riba nos accionnan positivo. Cualkier fortuna sea positivo of menos positivo cu bin den bo direccion semper bo por dun’e un nificacion y transform’e den algo balioso. Si nos pensamentonan ta positivo nos lenguahe y actitud tambe ta positivo. Ora cu bo mente ta trankil, abo tin e capacidad e ora ey pa trata cualkier situacion cu presenta den bo bida. Un mente trankil lo yuda bo mantene bo mente positivo sin ningun esfuerso. Si bo planta un simia di pensamento positivo bo ta cosecha un accion positivo. Semper mantene combersacion positivo cu hende. Tene na cuenta cu mas nos practica nos bida lo bira cada dia miho y miho.
Love Signals: E cantica di awe ta papia di, no preocupa ta felis. (Don’t worry be happy) Manera nos a siña di ta nervio nos por deshaci d’e emocion aki. Nos tin cu tuma tempo pa compronde situacionnan y bai na transforma nos emocion pa uno positivo. Purba na compronde e motibo y e pakico den cada situacion. Nos tin e habilidad pa enfrenta situacionnan di un manera cu ta hasta na beneficio di otronan.
Resumen y dialogo: E resultado d’e diferente temanan di awe ta indica cu nos ta den un fase di tranformacion. E tranformacion aki tin di haber c’e cambio di mentalidad cu mester tuma luga tanto personal y riba tereno colectivo. Nos mester yega na un balansa di pas y harmonia cu ta contagioso pa cada ser humano pa busca kico ta miho. E punto di salida t’e positivismo den pensamento, lenguahe y actuacion. Nos mester cuminsa na duna cariño y/of algo di nos mes.
Abundancia ta tur cos y no solamente economico. Cuminsa duna te hasta naturalesa, paso nos no sa kico e tin di ofrece nos. Nos tin cu aprecia locual cu nos tin rond di nos. Laga naturalesa dunabo, sinti e canto di un parha. Paso naturalesa tin energia pa dunabo y ora bo ricibi esey bo por compart’e cu otro. Nos tin cu pensa c’e material cu Dios a traha ta yena nos.
Ora di regala un hende algo e mester ta yena cu cariño, atencion, aprecio y amor cu bo tin pa e hende y asina e ta haña su balor. No t’e prijs cu bo a paga p’e ta conta.
Nos tur tin cu puntra nos mes con nos ta contribui pa tin un miho mundo. Nos mester tin e concepto di contribucion pa yuda. Usa bo comportacion manera bo guia. Nos no a nace cu cosnan di marca, ta cosnan cu ser humano a crea, nos mester ta mas simpel, cuminsa n’e basico.
Corda duna cu cariño y ban haci e diferencia!
Affirmacion:
“Cada dia den tur forma ami ta bira miho y miho, cada dia den tur forma abo ta bira miho y miho nos ta bira miho y miho, cada dia den tur forma bida ta bira, cada dia den tur forma miho y miho.”
Dor di haci esaki tur dia bo ta habri bo mes p’e regalonan di bida. Finalmente bida ta cuminsa bai bon pa bo y pa tur esnan rond di bo. Pls corda mantene bo mente POSITIVO!
