Chat cu Mente Positivo

Un bon dia na tur y un feliz comienso di siman.

Na prome luga un danki na tur e hendenan special cu ta para tras di e programa aki y cu ta pone den practic’e lema cu ta “solamente hende por yuda hende”. 

Kico si ta bon: E topico di awe ta “ALMA”. Nos tur sa cu tur hende tin un alma. B’a yega di sinta pensa kico bo alma ta haci cada momento di bo bida, ki influencia e tin ora di comunica. Kico ta su impacto na bo curpa fisico. Para keto un rato y puntra bo mes. Den e momento aki ki rol bo alma ta hungando? Pakico bo ta feliz of infeliz? Esakinan tin algo di haber cu bo alma? Porta e situacion cu bo ta bibando tin di haber c’e frecuencia di bo alma y no cu bo curpa fisico. Tin un cantidad di posibilidadnan cada momento cu por ta influenciando e situacion, incluyendo bo alma. Den bo mente tin pensamento, emocion y alma. Kico ta nan influencia den e bida diario? Bo mester para keto y hisa e frecuencia di nan tur y asina cambia bo mentalidad. Tambe bo tin cu zorg p’e curason ta trankil, esey kiermen cu bo tin mas frecuencia. E curason cu menos frecuencia ta influencia bo alma, pensamento y emocion. Pa nos papia di cambio nos tin cu cambia nos frecuencia.      

Buki di siman (Antraco): Self esteem. E ta papia di bo necesidadnan legitimo. Bo mester di aire, awa puro, come nutritivo, pañanan y un dak, tur eskinan ta necesidadnan fisico. Bo mester di stimacion, compañerismo, respet y compasion esakinan ta necesidadnan emocional. Bo mente mester di informacion, stimulacion y e reto pa resolve problemanan, necesidadnan intelectual. Bo mester ta bo so of cu otro personanan, esaki t’e parti social. 

Tambe tin spiritual, moral y etico. Den bida bo mester sa kico t’e proposito.

Pelicula di siman (Video one): The five people you meet in heaven. E ta un pelicula cu ta habri bo sinti. E ta di un hende cu despues di morto a topa c’e 5 hendenan.

Bril diferente: Aruba, a wordo duna atencion na diferente dianan internacional, e.o. paz, turismo y tambe autismo. E ta hopi importante pa s’e nificacion d’e dianan aki.  Fantastic garden a celebra 25 aña di existencia. Un danki special p’e iniciativa pa trece naturalesa mas cerca di hende. Internacional. Atencion a bai n’e debatenan entre e candidatonan presidencial di merca. Ciencia. Tin un aviso p’e mal funcionamento d’e señalnan cu nos ta ricibi via satelite. E satelite ta entr’e mundo y solo.

E bentana di nos bida:Awe nos ta papia di PLACA. Kico e ta y ki rol e ta hunga den nos bida diario. Placa ta cualkier cos cu un miembro di comunidad ta acepta como pago. E tema di placa ta dos tema den un, un banda nos ta haña e abundancia di placa y otro banda e escasez di placa. Hopi biaha ora nos papia di placa nos ta papia d’e falta di placa. Cuanto di nos sa bisa, e cos aki ta caro, mi placa no ta yega, gasoline a subi etc., nos mester para keto un rato, refleha riba e ley di atraccion y compronde cu locual cu bo focus riba dje bo lo sigui haña. Nos mester concentra ariba e abundancia di placa y nos lo tin resultado positivo.     

Love signals: E cantica Magic di Robin y Mary. E ta papia d’ un magia cu nos tur tin. Nos por pone e dolo desaparece y e presente briya, paso nos tur tin e magia. Pensa un rato den con b’a soluciona un situacion y con bo a keda sorprendi di bo accion, pensamento of sentimento, e momento aki bo a uza bo magia. Ora bo haci uzo di bo magia bo ta bira profesional den esaki y bo ta sigui crece pa otro nivel.

Resumen y dialogo: Temanan di awe ta: alma y mantene bo curason trankil   p’ asina hisa e frecuencia; nos mester busca mas profundidad den locual cu nos ta experiencia; placa y su abundancia; nos tin e magia pa crea cos bon.

Con nos por surpasa nos limitacion pa hisa nos frecuencia? E hende mester cuminsa laga los di dijs pensa cu locual cu nos ta wak, sinti y scucha ta locual cu ta existi. Si nos ta acepta cu tin algo mas, nos mester por cuminsa habri nos sentido y hac’e sin miedo pa biba e experiencia. Nos ta biba hopi mara na placa y no realisando cu si nos desaroya tur nos abilidadnan, placa ta dijs un resultado di ken nos ta. Cambia bo mentalidad pa cu placa y sa cu bo ta hopi mas cu esey.

Pa ki motibo hende ta gaña? Paso e ta kere c’e por gaña, pero bo no por gaña bo alma. Nos 5 sentidonan ta kere cu nos ta gaña, pero nunca bo no por gaña e parti mas sincero y dibino di bo cual ta DIOS.

Tips pa mantene curason calmo y un frecuencia halto. Puntra bo mes si e locual cu bo ta haciendo ta yudando of alma, curason of situacion. Si 1 ta NO, ya caba bo tin cu para, paso bo tin cu bai pensa algo otro.

Si nos no por wak e alma con nos por ta consciente di dje y sigui su guia. Si bo curason para bo sa cu bo no tin alma, si e ta bati bo alma t’ey. Uza e batimento di bo curason pa sa cu tin algo mas cu fisico. Prome cu bo actua, tin biaha bo mester tuma un “break” y reflexiona prome cu bin bek.

Con nos por logra habri caminda pa un persona cu no tin speransa mas? No tin hende sin speransa. Locual si tin ta un estado mental sin speransa. Paso e ta un estado mental, abo cu bo pensamento y emocion positivo pa c’e hende por yude cambia su estado mental.

Con bo ta yuda un hende kita limitacion? Aki nos por uza e mesun manera p’e estado menta. Kiermen cambia bo manera di wak e limitacion den e hende.

Semper wak e parti positivo di cada hende.   
Affirmacion:

“Cada dia den tur forma ami ta bira miho y miho, cada dia den tur forma abo ta bira miho y miho nos ta bira miho y miho, cada dia den tur forma bida ta bira, cada dia den tur forma miho y miho.”

Door di haci esaki tur dia bo ta habri bo mes p’e regalo nan di bida. Finalmente bida ta cuminsa bai bon  pa bo y pa tur esnan rond di bo. Pls corda mantene bo mente POSITIVO!