Siman di Paz
Un bon dia na tur y un feliz comienso di siman.
Na prome luga un danki na tur e hendenan special cu ta para tras di e programa aki y cu ta pone den practic’e lema cu ta “solamente hende por yuda hende”.
Kico si ta bon: E topico di awe ta obediencia. Obediencia na e plan dibino. Hopi biaha nos bisa cu nos ta kere den un forsa mas grandi cu nos mes, pero ora e momento yega nos kier haci nos mesun plan. E ora ey nos ta haña nos den conflicto. Ora e plan chikito di bo no resulta, e ora bo ta den conflicto cu e plan dibino. Bo tin cu para keto y puntra bo mes si e plan di bo ta den e plan di esun di mas grandi cu bo. Aki ta unda bo ta haña sa cu tin algo mas grandi cu bo cu ta guia bo y ta cu bo cada momento, esey ta bo alma. Kico ta e funcion di bo alma den comunicacion/pensamentonan? Bo alma no ta sali for di bo curpa. Tin biaha nos ta lubida cu nos ta sernan dibino bibando un experiencia humano. Asina ta cu e alma ta esun cu ta conecta nos cu esun mas grandi y ta yuda nos yega na e plan dibino.
Buki di siman (Antraco): Love as a way of life. E ta papia di e amor di berdad. Nos tin biaha no ta realisa cu amor di berdad ta di curason. Nos te kere cu nos ta kies ken nos ta stima y ken no. Nos ta lubida cu den e curason tin un alma y e ta influencia kico e curason ta bisa. Nos tin cu pone atencion na e influencia invisibel cu cada ser humano tin.
Pelicula di siman (Video one): The genius club. E ta siña bo ta kico enberdad bo a bin haci aki nan. E ta u pelicula pa pone bo pensa y saca informacion di dje.
Bril diferente: Mundialmente ta celebra awe dia di paz. Na Aruba nos ta duna atencion pa yega na e paz y harmonia cu tur hende ta desea. Politica tin hopi atencion rond mundo. Economia na merca a bai den un crisis y e ta bai wordo soluciona dor di hinca un suma di placa den dje. Actualmente na mundo tin cosnan menos positivo ta tumando luga y di tur esakinan e enseñansa ta cu mester practica tolerancia, pasenshi, aceptacion y compasion pa logra cambio
cu sabiduria.
E bentana di nos bida:Awe nos ta papia di PAZ. Paz ta un descanso profundo di e mente di un ser humano cu atrabes di sabiduria di un momento nos ta experiencia e milagro di scucha internamente e bos di Dios. Paz ta un energia di calidad, e ta simplemente e puresa di un experiencia spiritual, cu ta e esencia di tur religion. E calidad original di e alma ta paz. E ta e silencio interno na e berdad ta sosega. Pa alcanza e paz personal, nos mester ta mas conciente y scucha den silencio e bos interno, paso e caminda pa paz por wordo descubri den curason y mente keto.
Resumen y dialogo: Temanan di awe obediencia na e guia mas grande cu ta cu bo, bo alma. Weganan economico politico mundial cu trece hopi distraccion y ta pidi pa nos practica tolerancia, pasenshi etc. Dia internacional di paz y kico ta paz. Love signal a bin cu un quiz pa siña conoce bo mes.
Nos ta mas bezig cu pafo y masha tiki bezig paden. Nos tin cu bai paden y reflexiona y scucha nos guia. Nos no ta pone atencion ariba e impacto spiritual cada momento di nos bida. Con bo por conecta cu bo paden?
Kico pa evita? No laga hende, obheto y situacion ta e fuente di bo paz. Nos mester indenpendisa nos mes completamente di e mundo exterior pa ta e fuente di nos paz. Despues bo tin cu pone atencion na kico abo ta responsabel pa haci pa bo por ta paz. E ta un practica diario. E palabra pa logra tur esaki ta, esfuerso.
Con nos por logra yega na e paz ora cu nos ta deal cu tur tipo di adiccion?
Nos ta bira adicto paso nos ta kere cu e fuente di paz ta e droga, alcohol etc. Nos tin cu tene na locual cu nos no ta wak, pero cu nos ta sinti den nos curason. Un bon ehempel , busca un momento pa bo ta bo so y sinti internamente enberdad cu bo ta conecta cu algo mas grandi. Asina los di cualkier adiccion externo y bo ta bai tene na e un cos cu bo ta sinti na e momento di coneccion den bo curason. Cora cu ta un practica pa bo los di tur adiccion. Nos mester ta den e mundo, pero no parti di dje. Haci mescos cu bo ta den un helicopter y sali un rato for di e mundo, e ora bo ta realisa cu abo ta parti di e mundo. E ora ey bo por bai dicidi con bo ta bai influencia e mundo cu bo ta parti di dje.
Awe cu ta dia internacional di paz zorg pa e no ta dijs un dia, zorg pa cada halamento di rosea di bo ta PAZ.
Affirmacion:
“Cada dia den tur forma ami ta bira miho y miho, cada dia den tur forma abo ta bira miho y miho nos ta bira miho y miho, cada dia den tur forma bida ta bira, cada dia den tur forma miho y miho.”
Door di haci esaki tur dia bo ta habri bo mes p’e regalo nan di bida. Finalmente bida ta cuminsa bai bon pa bo y pa tur esnan rond di bo. Pls corda mantene bo mente POSITIVO!
