Chat cu Mente Positivo

Un bon dia na tur y un feliz comienso di siman.

Na prome luga un danki na tur e hendenan special cu ta para tras di e programa aki y cu ta pone den practic’e lema cu ta “solamente hende por yuda hende”. 

Kico si ta bon: E topico di awe ta cambio y confiansa. Den bida tin biaha nos ta haña nos mes na un crusada cu nos no sa ki direccion nos tuma. Sinta y reflexiona, confesa cu bo mes un curason locual cu ta molestiabo mentalmente of na un momento di tuma un decision den bo bida. Ora cu bo mente ta calmo bo por scohe y dicidi. Bida ta yuda bo. Haci tur lo posibel pa bo busca kico ta importante pa bo den bida, pero tambe kico ta importante    pa yuda otro cune. Ora cu bo a check tur cos, bo mester laga los y laga bida haci di su parti. Hopi di nos kier controla con e bida ta bai, nos no kier laga un espacio habri pa bida guia nos caminda tin e mayor enseñansa. Confiansa tin di haber c’e hecho cu bo ta permiti bo mes di biba e experiencia di un manera total c’un curason limpi, mente calmo y bo ta siña y crece di cada situacion. Confiansa tin di haber cu habri bo mes y bai cu bida, unda bida ta hiba bo.  

Pelicula di siman (Video One): The secret. E t’ un storia cu ta siña bo wak bida atrabes di wowo di un otro hende.

Buki di siman (Antraco): The master key system. E ta yuda bo compronde e proceso di pensamento.

Bril diferente: Na Aruba awa a yobe y asina por ta alimento pa nos suela pa cuminsa planta. E programa conecta cu bo yiu ta sigui y e ta un medio pa siña comunica cu bo yiu. Apertura di luna di cultura, atencion ta bai riba reflexion y nos desaroyo cultural.  Nos por experencia cu tin personanan a cuminsa scirbi bukinan, pa nos por siña di esakinan. Internacional. Horcannan cu a forma no a causa hopi daño manera añanan anterior. Medicina. Coffee, diet coke por causa presion halto. Experimento cu a fracasa den un laboratorio por resulta den un descubrimento di algo bon, manera cu for di awa salo por saca energia.  

E bentana di nos bida:                                

Awe nos ta bai papia d’e palabra cambio. Cambio tin diferente contenido. Pa un cambio inicia mester tin un causa, mester tin tempo y un proceso. Cambio den un ser humano. E cambio aki t’ un proceso, e no ta programa. Pa un hende haci un cambio e mester sali di dje mes. E mester tin un sentimento special. E curason lo conecta cu su mente na unda e plan di proceso y ehecucion ta wordo traha. Cada un di nos tin e habilidad y poder pa haci cambio den nos bida. Nos mester ta sincero cu nos mes si enberdad e sentimentonan aki ta sali di nos curason. Aki ta unda e bos interno ta guia, yuda, dirigi y ilumina nos. Mescos cu cualkier otro proceso cambio tambe ta tuma su tempo. Tur ta depende d’e tipo di cambio. Pa logra cu un persona por tuma decision pa cambia, ta dor di papia y dialoga. Laga e conseho y mensahe yega na su curason y na unda e mes lo realisa c’e mester haci un cambio.   

Love signals: Cantica “I believe”, Yolanda Adams.  Bo nunca lo yega asina leu. Lubida e anochinan cu bo a yora. Bo a traha hopi duro y bo sa exactamente kico bo kier y mester.  Asina ta kere y no “give up”. Djis papia cu bo alma y bise cu bo por.  No worry kico hende ta bisa mantene bo cabes na laira. Semper kere y bo lo logra.  

Resumen y dialogo: Awe nos a papia riba  cambio. Cambio mester ta pa miho y positivo. Bo mester tin confiansa den e guia pa yega na sabiduria y creatividad. Bo mester cuminsa kere den bo mes y nunca “give up” c’e cambio lo bin. Cambio t’ un proceso cu no ta caba. E proceso aki ta di evolucion d’e ser humano.

Con bo por pone bo mes e sapato di otro? Aki ta unda e palabra compasion ta hunga un rol importante. Bo lo ta dispuesto pa aplica compasion paso bo no sa kico e otro ta bibando. Laga los di tur opinion pa bo por tuma otro opinion. Nos tin cu bolbe bek na ken nos ta den esencia. Den estudionan di energia universal pa bo ta un miho hende bo mester laga los di distraccion, p.e. mal costumber, tradicion, cultura, relacionan etc. y limitacionnan, p.e. miedo, rabia, jaloersheid, etc. Bo tin cu sa di lubida bo mes pa yuda otro. Lubida bo mes kiermen ofrece di bo mes, e ta un servicio y no un sacrificio.

Con pa confesa na bo propio curason? Bo por sinta, hala rosea y sinti bo curason si e ta bati duro e no por scucha bo, pero ora e bira trankil e ora ei bo por papia cune y bise tur cos. Tambe atrabes di musica relahante bo por logra un mente calmo pa por scucha e stem di bo curason. Otro ta ora dia ta caba haci un resumen pa bo mes di kico a bai bon of malo y asina drech’e. No husga otro sin husga bo mes prome.

“Soulmate” ta existi? Tin hopi alma cu ora nan topa ta reconoce otro cu nan tin un trabou di haci hunto. E ta algo cu bo no sa con largo e mision cu otro ta bai ta. Bo mester permit’e  experiencia desaroya, no bring’e paso bo tin miedo di haci algo fout, bo no sa pakico bida a trece e alma ei den bo caminda. Permiti bida guia bo, djis keda semper limpi y puro den bo curason.      

Affirmacion:

“Cada dia den tur forma ami ta bira miho y miho, cada dia den tur forma abo ta bira miho y miho nos ta bira miho y miho, cada dia den tur forma bida ta bira, cada dia den tur forma miho y miho.”

Door di haci esaki tur dia bo ta habri bo mes p’e regalo nan di bida. Finalmente bida ta cuminsa bai bon  pa bo y pa tur esnan rond di bo. Pls corda mantene bo mente POSITIVO!