Chat cu Mente Positivo

Un Bril Diferente: E siman aki ta tin hopi lamper, strena y awacero cu ta trece energia y ta refrescante. Awa ta trece bida, bida pa entre otro nos flora y fauna. E ta dunanos e posibilidad pa produci nos mesun cuminda aki na Aruba. Tambe cunukeronan cu ta cria cabrito a reuni pa planea pa futuro.

Nos tin e final di e Olimpiadas. Caribe a hasi un bon papel; entre otro Jamaica, como tambe Venezuela, Brazil y Antiyas. Pa tin logronan den un competencia grandi asina mester di preparacion fisico como tambe esun mental. Ta rekeri cierto grado di concentracion.

E programa di “Chat cu Mente Positivo” na radio como na television ta haya hopi atencion y ta fomenta ideanan nobo pa hende y ta contribui na e desaroyo di ideanan positivo na Aruba.

Kiko Si Ta Bon Ban papia di: ilusion. Nos ta tende hopi biaha cu “bida ta un ilusion”. Kiko esaki kiermen? Anochi nos ta bai p’afo y wak e streanan y nos ta pensa: waw, bunita. Pa nos e streanan ta einan na e momento ei, sinembargo esaki ta un ilusion. E lusnan ei a stop di existi caba miyones di aña. Awor numa nos ta waknan.

Ilusion ta wak algo cu no tei. Para keto den e momento aki y realisa cuanto cos nos ta wak pero no ta asina. No ta nos 5 sentinan so ta determina nos realidad. Ta existi microbionan por ehempel, pero nos no ta waknan. No pasobra nos no ta wak algo, nan no tei. Hopi cos cu nos ta wak, no tei, y hopi cu nos no ta wak, tei.

E simannan aki ta tin hopi caso di sernan keri cua  bai y a impacta e isla. Hopi biaha nos ta zundra y piki fout di nos sernan keri, sin realisa cu esey porta e ultimo momento cu bo ta cune. Bai y biba cada momento manera ta e ultimo.

Ilusion ta sufri sin tin un motibo. Locual cu bo ta kere cu ta hasi’bo sufri, mi ta sigur cu bo por busca algo cu si ta hasi’bo sinti bon. Dicidi pa saca loke ta bon den bo bida. Tur cos ta un ilusion. Wak e streanan cu ta bunita pero cu no tei. Nan ta un refleho di kiko a existi. Ta importante pa aprecia loke nos tin awor.

Un persona cu recientemente a perde su pareha a bisami cu nan a disfruta cada momento. Hopi plannan cu nan ta tin no por a sigui, sinembargo nan a biba cada momento felis.

Disfruta di bida, saca e cosnan cu ta bon y biba na pas…

Pelicula di siman (Video One): I am Legend – Will Smith. E tin partinan poco mahos, sinembargo e final ta inespera. E ta duna speransa, no importa con mahos bo bida ta awor, e proximo momento por ta mihor.

Boeki di siman (Antraco): Ten Secrets for Success and Inner Peace – Wayne Dyer. Bo idea cu bo ta separa di Dios, ta locual cu ta crea problemanan den bo bida.

E Bentana di Nos Bida: e tema di e siman aki ta: actitud. Actitud di un ser humano ta tur cos. A base di actitud e tin abilidadnan pa transforma su bida y logra exito. E control cu bo tin di bo actitud ta demostra bo potencial y ta e calidad di e resultadonan.

Ningun persona tin dominio ariba nos actitud. Si nan por malinforma nos y duna nos fuentenan menos positivo. Solamente si nos entrega e control na e otro persona, e por controla nos.

Actitud ta valioso; ningun hende por hasi nos rabia. Solamente nos mes si nos perde control di nos actitud. Nan ta test nos dominio di nos actitud y si nos rabia of bira ‘onsportief’ nos a faya.

Ban acepta e responsabilidad di nos sentimentonan y nos actitud. Proteha nos mes di influencianan cu ta hiba nos actitud na un nivel abou. Nos tin cu confia den e actitud cu ta hiba nos pa un mihor futuro. Hopi importante ta pa mantene dominio total di nos actitud; e ta un tesoro di gran balor.

Nos actitud ta cambia como funcion di e experiencianan cu nos tin. Cu e actitud corecto nos tin un base pa exito. Un personahe solido cu un actitud positivo ta stabilisa e influencianan di afo. Nos tur tin e potencial, ban pone den accion. Asina nos ta demanda y ricibi e exito y felicidad cu nos ta merece. Actitud ta tur cos, ban cuide y dune atencion.

Love Signals: awe nos tin e cantica di R. Kelly “You saved me”. E ta papia di un ‘true story’ di con un persona a deal cu un situacion y a sali for di dje cu e resultadonan cu e kier.

Hopi biaha nos ta puntra nos mes: dicon loke nos resa p’e of manda energia p’e no ta resulta? Dicon tin biaha si y tin biaha no? Destino no ta den nos man. Nos ta busca ayuda den un creencia, un practica of un actitud pa yuda nos mes, nos isla y tambe yuda mundo. Den e proceso di domina esaki ta importante pa nos siña e les cu e palabra “incondicional” ta nifica. Realisa cu nos tin cu yuda incondicionalmente door di resa, manda energia y pensa positivo.

Por ehempel, ora un persona ta malo y bo a resa p’e y manda energia p’e y e l’a fayece, sa cu bo practica a yuda su proceso. Den un boeki cu m’a lesa nan ta splika cu “you did the best you could”. Na e momento aki bo ta hasiendo lo mihor cu bo por. Bo mester tin e perspective di unda bo ta awor y e guia pa jega unda bo kier ta aki un seconde. Ban check den e siman aki kiko nos ta hasi cada momento, si nos por cambia y con nos ta hasie. Resa, manda energia y desea incondicionalmente di un manera sabi y productivo!

 Resumen:

Pregunta di chatroom: e inconsciente ta afecta nos consciencia y por stroba nos? Si, esaki ta e parti invisibel cu nos a papia di dje. Asina hopi di e aspecto invisibel ta influencia nos actitud.

E inconsciente ta e parti cu tei pero nos no sa cu e tei. Hopi biaha nos ta kere cu hende no ta cambia, sinembargo nos tin cu drenta den e parti inconsciente pa yuda cambia e actitud. Pensamento y emocion ta un forma di energia y ta influencia otronan. Esaki ta influencia mental.

Con nos por cambia? Scucha e dos stemnan den bo y dicidi cua bo ta bai sigui – esun pa hasi abo y tur hende bon of e otro menos positivo. Si nos cambia nos pensamentonan, nos ta cambia nos emocionnan y tambe nos accionnan. Esaki ta nos comportacion y ta bisa ken nos ta.

E proposito den bida ta pa haya e caminda back na e mundo grandi invisibel cu nos no ta wak. Ban trece aden e curason; e ta algo hopi poderoso. No solamente e ta ‘pomp’ sanger pa nos curpa, pero tambe e ta procesa nos pensamentonan y nos emocionnan. Nos mester duna e curason mas balor como e aspecto mental. Ban para e distraccionnan rond di nos y realisa loke tin den nos curason. E ta manda señal y ta capta señal di e invisibel. Asina nos por cambia nos actitud.  Si nos curason para, tur cos ta stop. E hendenan cu a fayece ta pa duna nos e les di balora hende sin condicion. Siña biba, no ta egoista y stop di lucha pa poder.

Affirmacion: “Cada dia den tur forma ami ta bira miho y miho, cada dia den tur forma abo ta bira miho y miho nos ta bira miho y miho, cada dia den tur forma bida ta bira , cada dia den tur forma miho y miho.”
Door di haci esaki tur dia bo ta habri bo mes p’e regalo nan di bida. Finalmente bida ta cuminsa bai bon  pa bo y pa tur esnan rond di bo.Pls corda mantene bo mente POSITIVO